telaraña virtual

[ollo ao piollo] volvo

2010-03-18T10:25:00.004+01:00

xa choveu desde a última entrada deste blog, pero esta telaraña segu no lugar de sempre. é a araña a que é preguiceira, procrastinadora e enredante e a que non se digna a pasar por aquí. non será que un blog de primavera-verán que pecha no outono-inverno polo frío, ou iso intentarei.

o caso é que de agosto a marzo pasaron uns sete meses nos que as redessociais non deixaron de cambiar e cambiar: Google lanzou unha onda xigante que non acabou de chegar á costa, e nos últimos tempos decantouse polos zumbidos. Facebook non deixou de xogar coa privacidade e cos seus cambios no deseño. Twitter fíxose maior e busca aínda facerse meirande. Tuenti decidiu seguir cambiando de traxe e darlle ás linguas cooficiais. Spotify fíxose móbil, como case tódalas anteriores... e apareceron as redessociais con xeolocalización como Foursquare... e Chatroulette

e agora que vos actualicei a información, poderei seguirvos contando a historia

[análise] tu blog paso a paso

2009-08-06T17:51:00.005+02:00

as vacacións de verán, ademáis de para descansar, serven para tomar con calma algunhas cousas que o merecen, como é a lectura. confeso que nos últimos meses as miñas lecturas teñen algunha relación co ámbito da publicidade e internet, pero tamén estou aberto á literatura convencional. as arañas tamén podemos ser cultas, non?

Tu blog paso a paso, de Eva Sanagustín, chegou ás miñas mans grazas a unha promoción de Bloguzz. dediqueille o tempo necesario, e incluso fixen relecturas para ter unha opinión bastante fiable ao respecto

o deseño do libro pareceume moi acertado. estética clara, a dúas tintas, fonte san serif moi lexible e ao tamaño axeitado, táboas para entender mellor os contidos, aclaracións a pé de páxina, maquetación simple pero coidada... a única pega que poñería neste apartado sería a portada, posto que emprega un símbolo que só recoñecerían as persoas introducidas no tema dos blogs con antelación, o símbolo das sementes rss. non se supón que o lector ten poucas nocións do tema? persoalmente, e en tono gracioso, eu escollería unha portada coma a dos libros para dummies estadounidenses

os contidos son os xustos e necesarios. non se profundiza na elaboración nin en contidos técnicos tanto como me gustaría, pero si que se dan pautas e lugares de información complementaria para axudar no proceso. comprendo que o tema é suficientemente extenso como para abarcalo nun libro tan pequeniño. neste aspecto si que botaría en falta no último bloque falar un pouco máis sobre twitter e os tumblrs, tan á orde do día

libro recomendable para inexpertos, ou interesados na materia. sinxelo de ler, con moita información para comezar e coas guías básicas da publicación nun blog que me gustaría ter cando comecei neste mundo

información ampliada e ligazóns | Tu blog paso a paso [tumblr]

[sintonía] a canción do verán

2009-07-08T18:05:00.003+02:00

vacacións de verán son sinónimo de traballo para a industria discográfica. festivais, concertos e verbenas son o que identifican á época estival. o verán é a estación da festa, segundo os humanos.

e comezan a aparecer as primeiras manifestacións da plaga de cancións do verán que nos espera este ano. hoxe só vos traio dúas.
a canción dos Spamboys ten moito que ver coa publicidade e coas redes sociais, posto que fala dos seus 'hobbies', entre os que podemos atopar 'enviar mails y powerpoints de gatitos', 'chatear en Nochebuena' ou 'ponerte verde en tu muro'.

a aposta de Brody é un pouco máis p0rnogeek, con frases tan informáticas á vez que pegadizas como 'tócame el Windows', 'yo soy el disco duro del amor' ou 'tu antivirus es vulgar'.

e como dixo o gran King África: "A BAILARRRRRRR!"

[arañeiras] de odios, malos rollos, etc.

2009-05-25T10:42:00.004+02:00

todo o mundo sabe que aos inimigos hai que telos máis pegados aínda que aos propios amigos. en tódolos sitios, incluso nas redes sociais. por iso, humanos rancorosos, hoxe a araña fálavos de redes sociais [aka arañeiras] adicadas en exclusiva á manifestación de odio contra outras persoas, sexan anónimas ou famosas. grazas Jaime por pasarme este interesante artigo.

podemos diferenzar dous tipos de aplicacións: as redes sociais propiamente ditas ou as aplicacións que se engaden a unha determinada rede social para outorgarlle novas funcionalidades. así, na primeira categoría atopamos a ifuckinghateyou, con cinco anos de existencia e perto de 8000 perfiles. os amigos en ifhy só se poden agregar tendo un mínimo común de persoas odiadas, a diferenza que nas redes sociais 'convencionais'. neste apartado tamén se atopa myfrienemies, con características semellantes á anterior, pero que promete ademáis manter o anonimato do usuario.

como engadido para facebook destaca enemybook, unha aplicación que permite agregar inimigos e ver os inimigos de tódolos contactos. intégrase á perfección tanto co perfil, creando listas de inimigos, como co aspecto da rede social, sendo moi sinxelo de manexar.

[must!] the corporate weblog manifesto

2009-05-20T22:33:00.010+02:00

son unha araña privilexiada. fun condecorada, mencionada, paseada e citada nos blogs dalgúns dos meus compañeiros. eternamente agradecida a miña personaxe virtual e eternamente agradecido eu mesmo.

pero falando de blogs e das relacións entre os mesmos, esta semana chegou ao meu lector de feeds, procedente do blog de Raúl Ordóñez [CFO de Bitácoras.com, máis coñecido na rede como Jasp], unha entrada que contiña o The Corporate Weblog Manifesto.

The Corporate Weblog Manifesto foi escrito por Robert Scoble, gurú dos blogs e autor do blog Scobleizer, no ano 2004. nel recóllense 20 consellos, recomendacións ou obrigas que todo blogueiro debería respectar e aplicar en tódalas bitácoras que xestiona. lectura obrigada, a pesar de que se atope en inglés.

tómome a licenza de transcribir a norma número 1, unha das máis importantes.

di a verdade. toda a verdade. nada máis que a verdade.
se o teu competidor ten un produto que é mellor que o teu, lígao. será mellor. atoparémolo de tódolos xeitos.

[virtuosos vol.3] colorismo

2009-05-18T10:27:00.006+02:00

hoxe este blog énchese de cor, a pesar de que a miña vista de araña sexa tan pobre que non me deixe apreciar tanta riqueza visual como apreciades vós, os [miopes] humanos. envéxovos

ninguen dubida que as redes sociais son tamén marcas. os logotipos e as súas cores, logo das características propias da mesma, son as súas notas diferenciais. seguro que sodes capaces de asociar algunhas das cores da imaxe que acompaña esta entrada coa súa correspondente rede social, eu non dou pistas.

pero xa chega de discurso deste colorinchis! hoxe toca falar doutro virtuoso, ou virtuosa neste caso, que se dedica a falar de virtuosos. non, non é redundancia. hoxe esta telaraña ten o gusto de falar de colorismo, o blog da miña compañeira Marta López [@martolas].

a súa primeira entrada foi tan clara e concisa que non enchería nin un twitt: "nuevos creadores emergentes en relación con el mundo de las redes sociales", reza a entrada de fondo, que define claramente o contido do blog. a súa presentación, paradoxicamente, recorre ao gris e á austeridade, o que fai que as imaxes tan coloristas dos artistas, estratexicamente situadas, chamen a atención do lector.

ademáis, o tema do seu blog está intimamente ligado con este: tódolos creadores que sinala exprésanse nas redes sociais. case todos teñen flickr, myspace ou fotolog, ao igual que a súa propia autora.

excelente blog [ou redesocial] que non debe faltar en ningún Google Reader e/ou lector de feeds

[ollo ao piollo] Informe sobre o estado da blogosfera hispana 2009

2009-05-16T11:36:00.003+02:00

os humanos non parades de facer análises da vosa especie. que se debates sobre o estado da nación, que se programas do corazón... e tamén analizades os blogs

así, Bitácoras.com vén de presentar o Informe sobre o estado da blogosfera hispana 2009, o primeiro que edita a maior rede social para blogueiros en español. establécese así o perfil do blogger hispano. [servidor cumple algúns dos requisitos :P]

[ollo ao piollo] tuenti redeséñase

2009-05-06T19:51:00.003+02:00

o día pintaba mal, pero hai uns minutos o meu xesto de tristeza pasou a alegría ao iniciar sesión en tuenti coa miña conta. un novo deseño de tuenti, do que souben vía twitter, aparecía na pantalla do meu mac dándome a benvida.

Estamos sacando una nueva versión para hacer Tuenti aún mas fácil de usar.
Has sido elegido como parte de un pequeño número de usuarios para probar la primera versión beta del nuevo diseño y poder darnos tu opinión.
Por favor, ten en cuenta que está todavía en una fase temprana de desarrollo y aún puede haber algunos cambios sobre los que estamos trabajando.
Por favor, envíanos todos tus comentarios en el enlace en la barra de arriba.

o que puiden probar da nova versión gustoume. o deseño a simple vista lembra ao deseño actual de facebook, pero tamén achega novas funcionalidades e cambios: o número de fotos que aparece no perfil pasa de oito a dez, a pantalla principal mostra as primeiras palabras dos comentarios, os eventos presentan un gráfico de estatísticas, elimínase dos estados o verbo está... cando o probe máis en profundidade teredes noticias miñas.

atentos as próximas semanas!

[pausa publicitaria] The Spaniard

2009-04-28T21:18:00.006+02:00

onte deixei o meu traballo como araña durante unha horiña para asistir á conferencia que deu Marcos Chamizo, exalumno da facultade, sobre publicidade en redes sociais e que organizaron os nosos compañeiros de pont-e facebook group.

a súa presentación xirou en torno á campaña que elaboraron na súa axencia para Turismo Irlanda, a primeira neste 'soporte' tanto para anunciante e axencia. a acción publicitaria realizouse en facebook, twitter, un blog e myspace, descartando tuenti por non chegar ao público obxectivo das becas anunciadas.

o protagonista da campaña é o "bicho" que vedes na imaxe superior, The Spaniard, que é un estudante en Irlanda que vai narrando toda a súa vida e viaxes por todo o territorio. as entradas do blog tiveron gran resposta e incluso servirán de base para unha nova campaña publicitaria.

segundo as palabras de Marcos, as compañías estanse subindo ao carro da publicidade en redes sociais por ser un xeito económico de publicidade. de feito, esta campaña só supuxo para a empresa contratante o custo dos soldos dos publicitarios, pois as imaxes estaban dispoñibles na rede baixo unha licenza creative commons e os xestores de contido pódense empregar de xeito gratuíto.

a campaña tivo maior interacción no perfil de twitter, seguido do de facebook, que se viu beneficiado polos cambios que realizou na súa páxina principal, do blog e por último do de myspace, que aínda que tiña moitos amigos a maioría eran spammers.

tamén nos falou doutras accións que fará a cabo a súa axencia en redes sociais e de como afrontar a búsqueda de emprego. "traballo hai, pero hai que botarlle moita cara", dixo.

[ollo ao piollo] extensións dos contidos na Internet

2009-04-21T21:18:00.009+02:00

porque a extensión dos contidos na Internet con colorinchis se entende moito mellor, a araña deixou os seus apuntes de radio aparcados e pasou a tarde photoshopeando. as comparacións poden ser odiosas entre os twitts e os blogs, pero merece a pena ver as diferenzas dunha forma gráfica.

os datos sobre as diferentes extensións dos contidos na Internet foron recollidos en sendos posts de Tecnoculto e Kukamonga!.

e para culturizarse nestes temas, ademáis da CultuKata, tamén está o libro Cómo escribir para la web, dispoñible en PDF con descarga libre.

[pausa publicitaria] Aquarius

2009-04-20T17:32:00.006+02:00

esta mañá abrín, como é costume, a miña conta en tuenti e sorprendeume o evento patrocinado que estaba agardando a que fose visitado: Estreno del spot de Aquarius.

Aquarius, empresa dependente da compañía Coca-Cola, decide unha vez máis apostar por fórmulas novidosas para as súas campañas publicitarias. seguro que todos lembrades algunha das súas campañas anteriores como a de Radio Colifata, ou a que advertía do aumento de ventas do produto logo dun longo tempo sen anunciarse.

o spot, de un minuto e medio de duración, ten por título "El ser humano es extraordinario" e sigue a liña dos spots anteriores da marca de bebidas refrescantes.

[ollo ao piollo] Susan Boyle

2009-04-18T19:42:00.004+02:00

tradicionalmente falamos de tres poderes: o lexislativo, o executivo e o xudicial. outros din que hai catro, contando os medios de comunicación, e outros contan cinco con Internet. e cal pensades que é o poder que máis poder ten, valla a redundancia?

Susan Boyle, que xa ten entrada propia na wikipedia, é o último fenómeno de masas do Reino Unido grazas a YouTube. esta desempregada de 47 anos sorprendeu a todo o seu país coa súa particular apariencia e a súa xenial voz acudindo ao programa Got Talent [así como o Tienes talento]. o seu vídeo en YouTube ten máis de 26 millóns de visitas e aparece en xornais de máis de medio mundo e incluso nos blogs máis coñecidos.

parece que xa non é necesario ir a Gran Hermano para ser famoso!

PD: quen dixo que internet NON move masas?

[virtuosos vol.2] Nick Haley

2009-04-15T12:23:00.000+02:00

queridos humanos, hoxe por fin vou falar de publicidade e redes sociais! [si, lestes ben] vale que as arañas non temos que aturar os infinitos minutos de anuncios na televisión, ou os anuncios por palabras dos xornais, pero a publicidade tamén nos interesa [e moito!]

en setembro do 2007, tres meses despois do anuncio do lanzamento do iPhone, Apple saca ao mercado o reprodutor táctil iPod touch. os blogs especializados e a prensa non deixaron de enumerar as características que o distinguían dos trebellos da competencia: facilidadade de uso, elegancia e tecnoloxía revolucionaria.

dúas semanas despois do seu lanzamento, Nick Haley, un rapaz inglés que tivo o seu primeiro mac aos tres anos, subiu un anuncio para o iPod touch que el mesmo creou empregando imaxes da web de Apple, o programa de edición da compañía californiana e a canción 'Music is my hot hot sex' do grupo brasileiro Cansei de Ser Sexy [CSS], que encaixaba perfectamente coas calidades do produto.

os milleiros de visitas do vídeo fixeron que Apple se puxese en contacto con el para realizar xunto con TBWA, a axencia de publicidade que traballa para a empresa da mazá, un remake do anuncio. Nick viaxou ata California, con tódolos gastos a cargo de Apple, e colaborou na produción do anuncio que se emitiu nas televisións estadounidenses.

fonte | New York Times

[criando telarañas] myspace

2009-04-12T14:36:00.003+02:00

mentras vós, os humanos que me estades a ler, estades disfrutando dunha semaniña de vacacións [que ben facedes!] as arañas seguimos traballando a todo meter construíndo novas arañeiras. porque algunhas redes sociais xa non son o que eran, e senón, que llo pregunten a myspace.

myspace era 'o lugar' por excelencia para os amantes da música. a decadencia de myspace, fundamentada na loita competitiva con last.fm, e agora con spotify, comeza a ser sonada. atrás quedou a súa etapa dourada, cando grupos como os Arctic Monkeys ou artistas como Mika, Lily Allen ou Russian Red conseguiron un contrato cunha discográfica a través desta páxina.

pero a súa decadencia non é un tema novo. xa no 2007 se calificaba esta rede social como 'lenta, pouco usable e interesada en facer negocio e non comunidade'. algúns usuarios, a raíz disto e mais do spam, comezaron a abandonar as súas contas en detrimento doutros servizos web con iniciativas como o día internacional de borrado de contas de myspace.

á marxe da súa decadencia, hai que destacar iniciativas como a de TVE para escoller o representante da cadea en Eurovisión, que se realizou a través desta plataforma, e que conseguiu un notable éxito de público.

[fósiles] a historia de Internet

2009-04-09T20:04:00.002+02:00

descubro, entre as entradas do blog francés de deseño fubiz, un interesante vídeo sobre a historia de Internet, que aínda que está en inglés é doado de entender grazas ao emprego de iconas PICOL. que sería das redes sociais sen Internet?

[virtuosos vol.1] descubrimentos

2009-04-08T16:00:00.002+02:00

as redes sociais non son cousa de arañas, pero si que poden ser cousa de artistas. na rede podemos atopar auténticos virtuosos das artes. eu só me vou limitar a falar dos casos máis coñecidos e relevantes, pero a miña compañeira Marta descubriravos cor a cor no seu blog os novos creadores que están dando que falar.

no campo fotográfico topamos cun caso excepcional, o de Gerard Estadella, coñecido na rede polo pseudónimo icanteachyouhowtodoit, o seu identificador en myspace, fotolog e flickr. este rapaz de 28 anos estudou Publicidade e Relacións Públicas e exerce de DJ e fotógrafo nas festas máis glamourosas, facetas que o fixeron saltar á fama coa publicación de todo este material no seu blog. participa en revistas de moda, ademáis de na súa web persoal, e foi o fotógrafo da campaña spring-summer'08 de Pull&Bear.

no campo musical damos con Lourdes Hernández, máis coñecida como Russian Red. o seu periplo na rede comezou facendo amigos en myspace, ata que locales madrileños a chamaron para que tocara nas súas noites de micro aberto. grazas a isto tamén gravou o seu primeiro disco, I love your glasses, con grandes éxitos de crítica e ventas, púxolle música a un anuncio de xeados e converteuse en imaxe dunha firma de roupa.

[made in Galiza] blogaliza

2009-03-17T16:47:00.005+01:00

teño que recoñecer que son unha araña patria. que se lle vai facer! teño un certo cariño especial polos produtos autóctonos: a herba verde galega está deliciosa, e que dicir dos bechos galegos! ai omá que ricos!

no resto do mundo coñecen Galiza polo queixo de tetilla, a tenreira galega, os percebes... pero... temos algún produto dixital de interese?! por suposto! a rede galega está en continua expansión, pero son moitos os proxectos galegos que están a inundar a rede.

hoxe tócalle o turno á blogaliza, que máis que unha rede social propiamente dita é un servizo de aloxamento de blogs. en torno aos blogs, especialmente nos galegos, créase unha gran comunidade [si, aquí xa comezamos coas arañeiras]. a comunidade galega de blogs, agrupada en torno á blogaliza, recibe un nome propio: o blogmillo.

blogaliza aparece en xaneiro de 2003 como un directorio de blogs en galego con canle de IRC e lista de correo. non foi ata o 2006 cando comezou a ofrecer servizos de aloxamento de blogs e facerse máis coñecida. algúns, como Berto Yáñez, sosteñen que o blogmillo naceu trala crise do prestige e sitúan a data da explosión de usuarios no 2005, debido ás eleccións que levaron ao cambio no goberno galego.

fonte de datos | O uso de Internet nas redes sociais de Galiza, por Berto Yáñez e María Yáñez

[arañeiras] twitter

2009-03-16T12:40:00.002+01:00

poñámonos en situación. se hai unha práctica extendida entre os humanos esa é a de enviar mensaxes vía móbil nun reducido espazo de 160 caracteres. consistente niso [máis ou menos], pero con vinte caracteres menos e na internet, atopamos twitter

a vida dunha araña é tan monótona que non me merece a pena abrir unha conta, porque seguro que a vós non vos interesa o número de arañeiras que fago, ou cantos ovos poño...

aínda que a simple vista pareza unha intromisión dentro da vida privada das persoas, non é tal. o usuario cóntalle ao mundo o que quere cando quere empregando a propia web ou os centos de programas creados por internautas de todo o mundo. o seu funcionamento explícase perfectamente no seguinte video:

pero tamén hai aplicacións máis alá de contar o que se está facendo no momento no que se twittea. medios electrónicos tamén teñen a súa conta para dar a coñecer os titulares que están na súa web [elpaís], algúns personaxes de programas de televisión tamén teñen a súa conta para actuar cos televidentes [enjuto mojamuto], así como os programas [sé lo que hicisteis] e as propias canles [lasexta]. algúns usuarios tamén o empregan para controlar o tempo que lle dedican a algunhas tarefas e para levar a cabo os seus proxectos seguindo o método GTD como explican nalgunhas webs. os famosos tamén se apuntan ao microblogging para levar a cabo as súas campañas publicitarias e achegarse ao público [britney spears, al gore], e non están exentos de escándalos, porque incluso a algúns lles hackean as contas.

[arañeiras] os blogs, ou como se diga

2009-03-08T15:58:00.006+01:00

diferentes nomes [blogs ou bitácoras], diferentes pronuncias e formas de escribir unha mesma palabra segundo a lingua [blogue, bló, blog] e confusións con palabras semellantes como bloc. unha rede social moi complicada para nós as arañas.

mesmos fios pero diferentes tecidos, que diríamos nós. a cuestión está en escribir, de miles de formas e con idas de olla para tódolos gustos sobre calquera tema. os blogs persoais abundan, pero hainos de practicamente calquera cousa, incluso blogs de blogs como o da miña amiga Rachel. logo están os comerciais, nos que unha serie de escritores cobran unha certa cantidade mensual segundo o número de post que escriben sobre un tema determinado. a empresa española WeblogsSL xestiona máis de trinta blogs con diferentes temáticas que van desde apple ata a música pasando pola televisión.

e no ámbito que lles ocupa aos meus queridos homo sapiens sapiens publicitarios, os blogs tamén se poden empregar como estratexia de comunicación publicitaria. O blog dun hotel, creado por unha compañía para dar a coñecer un dos seus novos hotéis contando día a día a súa construción e ofrecéndolles aos seus lectores ofertas e descontos pode ser un bo exemplo. Tamén vodafone, como sinala a miña compañeira Merce, empregou nunha das súas últimas campañas un blog para dar a coñecer toda a acción publicitaria.

e esta araña que vos fala non lles deixa de botar ollo a varios blogs, entre os que se atopan os que vos sinalo abaixo, ademáis dos dos publicitarios da xeración OMB!

en error500 Antonio Ortiz, co-fundador de WeblogsSL, fálanos de redes sociais desde un punto de vista tecnolóxico e empresarial. nesta bitácora, cun coidado deseño en sintonía co resto de blogs da súa rede comercial, chama a atención a substitución do blogroll polos compartidos do autor en Google Reader. a comunidade do blog está chea de blogueiros hispanos que se concentran nas entradas que axudan a mellorar a experiencia do usuario nas redes, como na entrada de Gmail na empresa. o top de bitácoras.com sitúao no número 10 en importancia na rede hispana.

a bitácora persoal de Rosa Jiménez Cano, responsable de redes sociais de ElPaís.com e autora de La Gran Guía de los Blogs 2008, está chea de apuntes e novas que vai atopando pola rede sobre as redes sociais máis importantes. entre as entradas estritamente persoais, nunha plantilla por defecto de WordPress tuneada cuns cantos widgets atopamos un gran blogroll ordenado por categorías [amigos, xornalistas, techies...]. no top hispano aparece no posto 55.

eCuaderno é unha bitácora xestionada por José Luis Orihuela, profesor da Universidade de Navarra e autor do libro La Revolución de los Blogs, sobre medios e rede que emprega tamén unha plantilla básica de WordPress para informar sobre redes sociais con imaxes, presentacións e interesantes artigos. os enlaces aos blogs fundadores e asociados atópanse non pé da páxina, e vense complementados coa interesante lista de blogs que aparece na pestana superior enlaces. atópase no posto 33 dentro do top de bitácoras.com

así que xa sabedes, con coidadiño, que vos leo! ;)

[fósiles] inicios das redes sociais

2009-03-07T17:50:00.002+01:00

aínda que non o pareza, as arañas somos moi obedientes. vale que moitas veces nos resistimos a ser capturadas e insistimos en metervos sustos, pero á hora de facer o que temos que facer cumprimos sen rechistar. por iso, se os homo sapiens sapiens publicitarios queren que escriba sobre os inicios das redes sociais, fareino. aquí vai esa pequena introdución que esta araña debería ter feito na súa primeira entrada, pero non foi así...

os humanos descoñecedores das redes sociais actuais teñen unha pequena guía sobre elas nesta presentación. nela recóllese unha breve definición e unha clasificación de redes sociais coas súas principais características. pero ben, fagamos algo de historia...

como ben se recolle na wikipedia, as redes sociais teñen a súa base na teoría dos seis graos de separación [si, como na serie, como ben din no blog da novaágoragalega]. en base a esta teoría as relacións humanas estruturaríanse en base á nosa construcción máis célebre: as arañeiras. experimentos, investigacións e estudos tratan de investigar se esta casualidade é posible.

aínda que o seu nacemento data de 1997 coa rede social classmates, podemos dicir que o boom das redes sociais é máis ou menos recente, situando a súa explosión xa en pleno século XXI, exactamente no ano 2003 co nacemento da rede social musical myspace e a profesional xing. Seguiríanlles de perto lastfm, hi5 ou orkut, con máis ou menos igual de éxito.

nos últimos cinco anos o número de usuarios de redes sociais non deixou de aumentar de maneira expoñencial, ao igual que o número de servizos, que se viu aumentado de maneira considerable con multitude de funcións e en diversas manifestacións. aínda que non todo foi crecemento, moitas redes sociais foron quedando polo camiño...

para humanos curiosos que se interesen na historia das redes sociais e que saiban ingles, Danah M. Boyd e Nicole B. Ellison publicaron un interesante artigo no 2007.

imaxe | 2008 Web Trend Map de Information Architects

[ollo ao piollo] a letra pequena

2009-02-26T11:28:00.003+01:00

picar humanos é o noso oficio, pero temos uns grandes competidores: os piollos. si, eses pequenos seres microscópicos [para os humanos, claro] sempre están dispostos a fastidiarche o negocio. vós tamén lles tedes algo de manía persecutoria, que nós ben o sabemos. de feito, o nome da sección que vos presento hoxe é un dito popular que todoserhumano sabe.

ás arañas o tema do que vou falar hoxe non nos afecta tanto, pois [obvio!] os nosos órganos visuais son moito máis pequenos ca os vosos. así, para nós a letra pequena é considerada estándar, e a normal [segundo os humanos, claro] parécenos enorme.

é unha práctica superhiperultramegaextendida entre a poboación terrestre a de darlle a aceptar a calquera cousa sen ler os termos de uso ou as condicións do programa ou páxina web. poderíase considerar incluso como deporte nacional. as redes sociais non se libran da letra pequena, e estes días está de actualidade polo cambio das condicións de uso de facebook.

tanto facebook como tuenti recollen nas súas condicións de uso [termos de uso, aviso legal ou derivados] toda información referida ás licenzas e aos posibles usos que lle pode dar a compañía a todo o contido que sube calquera usuario. para evitar sorpresas en calquera rede social ou páxina web, é recomendable ler as enormes parrafadas.

pero as letras pequenas non só están na rede, tamén están nos papéis que vos mandan firmar moitas empresas, especialmente as de telefonía. e con este tema xogou nun spot publicitario a compañía de telefonía móbil yoigo

imaxe | captura do anuncio de yoigo

[criando telarañas] fotolog

2009-02-16T22:16:00.009+01:00

á marxe de pasar parte do tempo asustando a algúns humanos, a nosa vida consiste basicamente en facer arañeiras. si, arañeiras, lestes ben. digamos que telaraña está un pouco mal dito en galego. cousas de arañas, que nos levamos mal cos dicionarios.

a nosa nova urbanización témola establecida nas redes sociais, onde xa dispoñemos dunhas cantas arañeiras. hoxe vouvos falar da que denominamos fotolog, situada nese lugar onde milleiros de humanos adolescentes colgaban as súas fotos emo, as fotos dos botellóns e as tremendísimas dedicatorias en datas sinaladas. e digo colgaban porque esta rede xa non é o que era. redes sociais como tuenti ou facebook absorberon e ampliaron a súa principal función, publicar imaxes tomadas polos humanos máis novos, e leváronlles os usuarios!

na súa opción gratuíta e básica, fotolog só deixa subir unha imaxe diaria, na que como máximo poderán comentar vinte usuarios. tuenti, por exemplo, non ten nin límite diario de subida de imaxes nin de comentarios en cada unha delas. aquí é, como din en fullflog, onde se demostra a clara intención lucrativa desta rede social en decadencia: quitar a publicidade e pasar os límites custa diñeiro.

para os humanos interesados nos números, nunha enquisa realizada recentemente en genbeta para saber cal foi a mellor rede social do 2008, fotolog quedou en último lugar cun 4% dos votos.

ai! se ao final as arañas teremos que facer conta en facebook para ver fotos de humanos...!

tecendo

2009-02-16T10:53:00.000+01:00

seguindo o formato das entradas da miña querida amiga, a araña das oito patas e todas coxas, este rapaz que vos fala intentará achegarvos dunha maneira amena e divertida ao inmenso mundo das telarañas virtuais: as redes sociais

novas, trucos, consellos, investigacións e conversas tecerán esta pequena telaraña que estades a ler.

lémonos!